Brenda.
Gyul tell NEW YORK dat AH COMIN', AH COMIN', AH COMIN'. Ah see d survey jus' out ah d cornea ah mih eye, had intentions of responding, buh den Papa God put mih on a new path, sen' mih on a journey here dat have evryone in shock. I mihself does be shakin' mih head at times. Papa God tell me dat ah was getting too settled and dat ah have to come out ah d comfort zone dat ah was in. Workin' wid young people and chirren is a breeze, leh mih tell all yuh. It easy, easy. Workin' wid big people? WHEW!!!!!! So de Fadder say "nah you goin' along too good, yuh need to step up yuh 'game' to anodder level". He say to mih dat it eh go be easy, buh he know how ah like a good challenge, an he know dat I have never taken de easy way out in anything dat I have to do. He know dat, when ah resign from de Govament Service, when ah pick up mih handbag an walk out of a principal office after fighting wid him over d expulsion of a young man (he wanted to expel him, an I wanted him in school so dat I could work with him). It is expedient for principals to expel children and make the problem somebody else's) He knew that day when I walk out a d school, where I was headed. It took twenty years of blood, sweat and tears, but He knew where ah was headed. So ah in d ting an dis nex 3 days will look like 3 years. Monday 24 is Liberation Day in T &T, no matter what. Mannin' eh know what he do. African Liberation Day is in dis time too, he eh know what he do. Anyway remember me in your prayers. Dis nex 3 days will be pace an thunder. Imagine in our beautiful country the threat of violence is hanging over our heads. Ah cyah believe it. Luv mih Mausica family. I end wid mih mantra "Thy will be done on earth as it is in heaven."
Remember me in your prayers. Anna Maria Mora (doh fuhget to write mih name dong in whatever book allyuh writin' wid d list ah people who comin' New York.. Ah eh makin' joke wid dat allyuh. Allyuh eh want to see mih wrong side).
Anna Maria Mora
No comments:
Post a Comment