2017-Aug-17-0346Hrs
My Fellow Mausicans,
Aye, hear nah man, I like de back ah de bus.
Not de very last row; about de fourth row before de back..
De lime does be de sweetest in de back
Plenty ***t talk, ole talk, debates and lots of laughter.
Remember wen Finbar shout out , "Yuh does still give man money?"
Slow down driver! Look de fella comin.
Wen we was passing thru Chaguanas, ah Mausican from quite England pass ah white envelope through de back window tuh ah fella in ah blue jersey.
Yuh talk bout laugh and inquiries!
But de most raucous outburst was wen Graham unwrap de biggest bake and shark ah ever see.
"Boy,like yuh goin an feed de five thousand or wat?"
De bake was about two pounds. Everybody on de maxi coulda take ah bite.
There was serious bonding too between me and meh half Chinee, Havenite Brother, Allum, and his wife., Dirka.
Me and Joy Valdez traded books.
Meh Mausican sistah is ah serious poet,oui.
Order ah copy.
Ah cyar wait fuh de next reunion.
Let's take ah cruise tuh Barbados, nah.
Plenty Mausicans have Bajan connections.
2019 we headin fuh Bimshire, little England..
Is 3:40 a.m.
Ah gorn.
Rodney Foster, 66-68.
No comments:
Post a Comment